هات الربابـة والقلـم والقراطيـس
وفنجال بن ريحتـه تقعـد الـراس
صبه وعـده للرجـال الاشاويـس
اللي لهم في عجفة الوقت مرمـاس
كسابـة النامـوس ردادت العيـس
لا صار بالفرسان حايس ومحتـاس
لا صار مع عج الرمك يفتل ابليس
صولاتهم يا مسندي تبعـد البـاس
يفداهـم اللـي عيشتـه بالدنافيـس
من دور جده بانين للـردى سـاس
فار (ن) ينجس لا وطا القاع تنجيس
نمام بالمقفي علـى الشـر بـلاس
من بعدها سر يـا قلـم بالمقاييـس
واكتب مقاييس (ن) صعيبات تنقاس
وقت ينكسني على الضيـم تنكيـس
تنكيس خيل مضريات(ن) للانكاس
على جروح المرمسـه يالنسانيـس
هبي عليهن نسمـة تبعـد اليـاس
سود الليالـي مندبتلـي عواسيـس
طوارين نضربها خماس واسـداس
ملجاي ابو ياسر عثت بي الهواجيس
منها يسيل الدمع والنـاس جـلاس
ما غير المس محجر العين تلميـس
واقول قلت نوم معمسنـي اعمـاس
اضحك واجامل والحشى به مقابيس
وليا اكبسوا كبست معهم بالاكبـاس
هم(ن) تلبس تومت القلـب تلبيـس
اودع عروق القلب يالقـرم يبـاس
يالعبدلـي وش حيلتـك باللواليـس
عيت تعدل جعل ابوهـا للافـلاس
ليا جيت اعدلها يا ابوياسر اتنيـس
تلعب بها الارياح مع كل نسنـاس
عيت تقابض لي كثيـرة دواحيـس
كل ما التفت القالها الـف مدحـاس
والقلب متمرس على الكود تمريـس
ماصد عن دربه جزوم(ن) ودواس
وانا احمد الله مكرس الجهد تكريس
بندق وشلفا وللحطب محضر فـاس
لابد ما تضحك وجيه(ن) معابيـس
عقب التكدر والعنا تصبح اونـاس
يصبح سهلها خالي من التضاريـس
نركز معزة روسنا بكـل نبـراس
وصلاة ربي عد ما بالحـرم ديـس
على النبي واعداد ذرات الاطعـاس
الخميس مارس 20, 2008 5:21 am
